அடிக்கடி தனக்குத்தானே முத்தமிட்டுக் கொள்பவன்
தன் கடைசி அடைக்கலமாய்
அந்த மதுபானக் கடையின் பாரில் சென்று அமர்ந்தான்
தொடர்பு எல்லைக்கு அப்பால் இருக்கும் நண்பனால்
அன்று அங்கு வரமுடியவில்லை
காத்திருந்து சலித்துப்போன வலி ஒன்று
நண்பனின் குவளையிலும் அவன் குவளையிலுமாய்
தன்னைப் பலி தந்தது
தன் பங்கு மதுவினை காலி செய்த அவன் எதிரில்
நண்பன் வந்து அமர்ந்தான் எதுவுமே பேசாமல்
நண்பனின் மௌனம் தாளாத துக்கத்தைத் தர
இவன் மீண்டும் சப்ளையரை அழைத்தான்
மறுபடியும் மறுபடியும் சப்ளையரை அழைத்தவன்
மேசையில் கவிழ்ந்து கிடந்த
நண்பனை அள்ளித் தோளில் போட்டுக்கொண்டு
' நான் பட்டி விக்கிரமாதித்தன்'
'இவன் கெட்டி வேதாளம்' என்று ஏதேதோ உளறியபடி
நடந்தான். நகக்கண்ணில் வேட்டி நுனி சிக்கி
கலங்கிய கண்களுடன் சாக்கடையில் விழுந்தான்.
வேதாளம் விட்டு விலகிய பின்னும்
விக்கிரமாதித்தனால் எந்திரிக்கவே முடியவில்லை
சுழலும் அச்சாக்கடையிலிருந்து
கடைசி வரையிலும்.
வே .பாபுவுக்கு
No comments:
Post a Comment