நகர வீதிகளில் அலையும் குரல்கள்

ஒரு நிறுவனம் ஒருவனைக் கொன்றுவிட்டது

அவன் கவிஞன் என்பதால் 

மூளையின் வலது பக்கத்தில் சிறிது அகற்றி 

கழுத்தில் கறுப்புக் கயிறு கட்டித் தொங்கவிடப்பட்டு 

நிறுவன அடிமை அட்டை பளிச்சென்று தெரிய 

பாதாள அறையில் அவன் பணிகள் நியமிக்கப்பட்டன 

அவன் விளிப்பு அவன் செவிகளிலேயே

விழாமல் போனது 

பசியின் துரத்தலில் பதுங்கியவன் நிழல் 

நிறுவன கரங்களின் அணைப்பிலிருந்தது 

அவன் புன்னகையைக் களவாடி 

யாழினைத் தந்தனர் கையில் 

இறந்தது தெரியாதது போல் நடிக்கிறவன்

சிறந்த நடிகனாகிவிட்டான் கவிஞன் 

அவனுடைய ஒப்பமில்லாமல் தயாரிக்கப்பட்ட 

ஏவல் பத்திரத்தில் அடிமைப் பாத்திரமென 

பொறிக்கப்பட்டிருக்கிறது 

சுயம் அழித்து வெறித்த விழிகளுடன் 

சிக்னல்களில் சிக்காமல் இயக்கப்படுகிறவன் 

பாதங்களில் சங்கிலிச் சத்தம் 

நிறுவனங்கள் நிறைந்த நகரமெங்கும் 

சுற்றித் திரிகின்றன 

விதை நசுக்கப்பட்ட வெற்றுக்குரைப்புகள்.

   தீராநதி 2011 நவம்பர் இதழில்