பைத்தியங்கள் திரியும் காடு

மழைக்குருதியில் நனைந்த
வெள்ளைப்பூக்களின் தலைக்கு மேலே
வட்டமடிக்கும் பிணந்தின்னிக் கழுகுகள்

உபயோகிக்கப்பட்ட உடல்கள்
விசிறப்படுகின்றன காடெங்கும்

துடிக்கும் அவளை ரெண்டாய்ப் பிளந்து 
வெளிவரும் சிசுவொன்று
குண்டுவிழும் ஓசையுணர்ந்து
சட்டென்று பின்வாங்க
அதிர்கிறது யோனிப்பாதை

உயிர்வாதை தீராமல் வளர்ந்து வரும் பாதிச்சடலம்
தன் பிரார்த்தனையில்
அடிக்கடி மாற்றுகிறது கடவுளின் பெயர்களை

தோட்டாக்கள் முளைத்த மரமொன்று
சாகத் தொடங்குகிறது  மெல்ல

அழுகிய சதையுடன் அலையும் பைத்தியங்கள்
ஆகாயம் பார்த்து சபிக்கின்றன

சருகுகளை நிலைகுலைக்கும் பேய்க்காற்று
மண்தடவி உறிஞ்சுகிறது
திறந்த விழிகளின் மீது உறைந்த உயிரினை.

நன்றி தீராநதி