ஒரு புள்ளியில் ஆரம்பித்து
கோடென நீளும் உன் சிரிப்பு
இந்த இரவினைத் தாண்டிச் செல்கிறது
விரையும் நிலாப் பாதையில்
என் விரல் பிடித்து அலையும் லதா மங்கேஷ்கரின் குரல்
உனக்குத் தெரியாமலே
என் பாடல் வழி சாலையில்
உடன் வருகிறாய் நீ.
அர்த்தங்கள் அடங்கிய சோகத்தை
மொழி பெயர்க்க எனக்குத் தெரியவில்லை
நீ விலகிய இந்த நொடியில்
பிறக்கிறது நமக்கான பாடல்
கண்டம் தாண்டும் காற்றின் அலைவரிசையில்
நீயும் நானும் லதா மங்கேஷ்கரும்
மின்சாரம் இழந்த நள்ளிரவில்
செவியெங்கும் நிறைந்து வழியும் எங்கிருந்தோ அழைக்கும் கீதம்
நீயுமின்றி நானுமின்றி
நகரமெங்கும் திரியும் வெப்பத்தைக் கடத்துகிறது
லதா மங்கேஷ்கரின் குளிர் நிரம்பிய வலி.
No comments:
Post a Comment