பிரச்சனை

வண்ணத்துப் பூச்சிகள் நிறைந்த வனத்துக்கு
என்னை இடம்பெயரச் செய்யுங்கள்
கருகிய புல்லாங்குழல் என் கண்ணுக்கு காணக் கிடைக்கும்
நிறைநிலா இரவுகளைப் பரிசளியுங்கள்
இமை திறவா நாய்க்குட்டியின் மார்கழிச் சடங்கில்
பங்கேற்பேன் நான்
பூக்களின் வாசனை பொதிந்த ஒலி நாடாவினை
எனதறையில் சுழலவிடும்போது
நேற்றிரவு பிறந்து இறந்த ஈசல்களுக்காக
கண்ணீர் அஞ்சலி வாசித்துக் கொண்டிருப்பேன்
மூன்றாம் நாளில் உயிர்ப்பித்த கதையை
ஆனாந்தம் பொங்க அறிவிக்கும் போதெல்லாம்
முள்முடியும் ஆணியும் சிலுவையும் களையாத
பிதாவின் உறைந்த கண்களில் நான்
என்னதான் உன் பிரச்சனை என்கிறீர்கள்
ஆமையின் ஆயுளினை
வரம்பெறாத ஈசல்கள் வாழும் உலகில்
சிலுவையை விரும்புவனின் வாதையை
பிரச்சனையென்கிறீர்கள்
நன்றி மலைகள் .காம் இணைய இதழ்